أجي تفهم كيفية التسجيل في موقع لانابيك ANAPEC




أجي تفهم كيفية التسجيل في موقع لانابيك:

1- أول خطوة هي التسجيل في الموقع الرسمي للوكالة www.anapec.org
2- غاتدي الوثائق ديالك الأصلية او نسخ مصادق عليها للوكالة اللي تابعة محل السكنى ديالك (الديبومات، شواهد ديال الخدمة أو السطاج، بطاقة التعريف، وسيرة ذاتية يعني CV) هادشي كامل باش يتحققو من المعلومات اللي دخلتي فالسيت ويڤاليدو ليك الضوسي ديالك ... هاد الوراق كاملين غادين يرجعوهوم ليك


ملاحظة: هاد العملية ديال تأكيد التسجيل validation ممكن تكون بالموعد rendez-vous فبعض الوكالات حيتاش عليهم ضغط كبير

من بعد أصديقي غاتبدا المهمة ديالك ... خاصك تدخل للكونط وتبوستولي لعروض العمل اللي نتا مهتم بيها حيتاش أغلب الناس غالطين راه لانابيك ماتايشدوش CV هوما تايجيبو عروض العمل ونتا اللي خاصك تجتاهد وتدخل كل مرة بدون ملل أو كلل حتى يجيب الله التيسير ... وإيلا شفتي باللي راه ماتايجاوبوكش يعني راه كاين مشكل :


* يقدر يكون الدبلوم ديالك ما مطلوبش فسوق العمل وهنا خاصك تتسجل فشي تكوين ديال الوكالة (اللي هو مجاني) وكايتيحليك تعرف شي مهنة أخرى تقدر تدخل بيها لسوق العمل.

* يا إما راك غير تاتعفط على postuler بلا ماتقرا أش طالبين وعندك تقني متخصص بحال تقني بحال qualification وهنا كاتكون أغلب المشاكل حيتاش أغلبية المترشحين ماتاتكونش فيهم الشروط اللي طالب المشغل.
خاصكم تنتابهو حتى للخبرة اللي تايطلبو فعروض العمل بعض المرات.

نصيحة للناس اللي تاتمشي للسيبير cyber يصاوب CV ... راه خاصك تصاوبو راسك أولا ملي تمشي عند المستشار فالتشغيل يوريك كيفاش دير تصاوبو ... وكيفاش دير دوز entretien حيتاش الأغلبية ماتايعرفش حتى يقدم راسو أو يهظر على التجربة ديالو ... وهذا مشكل كبييييير فالمغرب حتى واحد ما باغي يطور راسو كلشي كايلوم الناس الآخرين ... الإخوان خدمو على راسكوم مزيان راه مابقاش زمان الحوفار ... راه هاد الزمان بغا العقل وشي مهنة تكون تاقنها وعندك ماتقول أو أضعف الإيمان تكون متمكن من داكشي اللي قريتي.

انتهى...
أحدث أقدم

ads g

ads

نموذج الاتصال